Monday, December 11, 2017

උන්නු පෙම්වතුන්ට කප්පරක් ආදරෙන්


Image result for walking away girls

මඟ දිගට විසිතුරු බලමින්
මැණිකේ උඹ ලඟින්
ඇවිදන් ආවේ හෙමි හෙමින්
යන්න හිතානයි බෝ දුරක්
අතරමගකදී උඹ ඉතිං
පොඩියකට හැරිලා එන්නං මෙතනින්
කියා ගිය පසු සැනෙකින් මඟින්
ගිණි ගහන අවුවේ බලන් උන්නේ මං හිටං
ඇදුම් කන කකුල් කෙටි
කරකැවෙන ඔලුගෙඩිය
මේචල් කොරන් මං
ලගින්න උඹ එනකං
කකුල් කෙටි අද්දාන
අඩිය දෙක එකතු කර
ආවා මං ටික දුරක්
හෙවණක්හොයාගෙන
පියෙන් පිය , පිය මැනන්
නොදැනීම ඇවිදගෙන
ආපු දුර බොහෝ බව
දැනුනේ මඟකදියි බං
කලබලෙන් මං ඉතිං
විපරමින් හෙවුවාම
උඹ එහෙම නැවතිලයි
කනට වැටුනා සැනින්
උර තියන් ආ මතක කද
අතරමග හලාගෙන
හෑල්ලුවෙන් ආවේ
අත් දෙකම වනාගෙන
විටෙක උරකට වාරුවී
විටෙක තනියම පයින්
උඹ ඇතැරි දින පටං
ඇවිත් මං දැන් බෝ දුරක්
සෙල්ලමට වගේ මම
බැලුවාම ආපු මග
අනේ උඹ එතනම
අරටු බැහැගෙන දිරනවා එකතැන
ලාවට වාගේ මට
දුක හිතුනා ඇබින්දක් තරමට
මඟදිගට අහුලාපු ජීවිතෙන්
අඩක්වත් දකින්නට
පින තිබුනේ නැනේ  උඹට...

Thursday, December 7, 2017

පදු කුමාරි...

Related image

උපන්න දොහේ ඉඳන්
පපු කැනැත්තේ පතුලටම ඔබාගෙන
අප්පච්චි මාව මැණික් කැටයක් වගේ රකිද්දී
සත්තයි මං හිතාන උන්නේ
මං රජ පැටියෙක් කියලා
ඉල්ලන්න තියා හිතන්නත් කලියෙන්
ආදරේ ගෝනි ගනන් පුරෝලා
ඔලුගෙඩිය උඩට පාත් වෙද්දී
මං රාජකීය තොටිල්ලක
සීරුවට නැලැවුනා
රජ පැටියා කුමාරිකාවක් වෙලා
කුමාරයෙක් මුලිච්චි උනු දා
සත්තකයි මං උන්නේ
හෙට අනිද්දා බිසවක් වෙන්න යන
සංතෝසේ එලිපත්තේ
ඒත් හාවක් හූවක් නැතුවම
මගේ ලෝකෙට කඩා පාත් වෙච්චි
කුමාරයාගේ මව් බිසව
හාංකවිසියක්වත් නොදන්න මගෙන්
මගේ රාජකීය ලේ උරුමෙට
පත්තිරු ඉල්ලද්දී මගේම උප්පැන්නේ
සාක්කි කිවුවෙත් තනිකරම මගේ හරහට
පද්දොන්ට හිර දෙන්න බෑ කියලා
උඹලැයේ අම්මා මගේ පපුවට බෝර දාද්දී
කුඩුවෙච්චි හෘදයවස්තුවේ කෑලි
පපුව ඇතුලේම මං වල දැම්මේ ශතවර්ෂ කාලක් තිස්සේ
ගඩොලෙන් ගඩොල එක්කහු කරලා අප්පච්චි බැඳපු මාලිගාවේ
රජ පැටියව මරලා දාන්න බැරි හන්දා මිසක
උඹට ආදරේ නැති හන්දා නම් නෙවෙයි...

Monday, May 30, 2016

බුකියේ බිත්තිවල විත්ති..


තමන්ගේ බිත්තියේ තමුන්ට ඕනෑ එකක් ලියා ගනීමට අලවා ගැනීම පූර්ණ නිදහස තමන්ට ඇත..සකර්බර්ග් අයියාට ෆ්ලවර් ජම්ප් උනේ නැත්නම් ඕක බිත්තියේ එල්ලිගෙන තව චිරාත් කාලයක් ඔහොම්ම ඉන්නවා ඇත.දැන් දැන් සකර්බර්ග් අයියා ඒ කාලේ බිත්තිඋවල කුරුටු ගාලා අමතක වෙච්චි ඒවා අපි වෙනුවෙන් බිත්තියේ කෙලෝරට ගිහින් හොයන් ඇවිත් පොටෝ කොපි ගසා ආපහු බිත්තියෙ අලවා දීමට තරම් කාරුණික වී ඇත.එවිට අපිට එකල මෙකල අපගේ බිත්තියේ ප්‍රගමනයද මැන ගත හැක.

හැබැයි තමුන්ටත් තමුන්ගේම කියලා බිත්තියක් තියාගෙන අනුන්ගේ බිත්ති වල අනිවාර්තේ ඉඩ නාස්ති කරන එක නරකය.කොල්ලටයි බල්ලටයි බිත්තියට කිට්ටු නොවෙන්න වැටක් බැඳලා නම් යාන්තමට හරි බිත්තිය බේරා ගන්න පුලුවන් උනත් ගෙදරට ලියනමක් එවලා හරි අනුන්ගේ බිත්තියේ තමුන්ගේ විස්තරේ පල කිරීමට ඇප්පෘවල් ඉල්ලන උන් එමටය.සෙට් එකක් එකතු වී බිත්තියේ මොනවාහරි අලවා ගත්තොත් ඒක උන්ගේ ආතල් එක කියා පාඩුවේ ඉන්නට බැරි කොට්ටසයක් හිඳී.උන් බිත්තියෙ පාමුල කුණු දමති.මූත්‍රා කරති.හූරති.බුලත් කෙල ගසති.අවසානයේ බිත්තිය අයිතිකාරයා හෝ බුකියට අදිපති සකබර්ග් අයියා පමිණ පෝස්ටුවේ කලුතෙල් උලා දමති.

බිත්ති හින්දා සමාජයේ හෙන ගැටලුය.ඇතැම් විට බිත්තියේ අලෝන ඒවා නිසා ගෝලීය උශ්ණත්වය , ග්ලැසියර් දියවීම, ඕසොන් ස්ථරය හිල් වීම වැනි ප්‍රශ්නවලටත් වඩා මහා ප්‍රශ්න ඇති වේ. සමහරු ප්‍රශ්න නැති සාංකාවට ප්‍රශ්නයක් හොයා ගන්නද බිත්තියේ ලියති.මෙකී නොකී බිත්ති වල විත්ති බොහෝමයකි.ඒත් මේ විත්තිය සකබර්ග් අයියාට යස අපූරවට මීටර් උනු පසු සිරිලංකාවට විතරක් බිත්ති සඳහා විශේශ බුකී චක්‍රලේකයක් නිකුත් කරනු නිසැකය.අන්න එදාට මක්කවත් කොරන්න තමුන්ගේම කියලා බිත්තියක් අහිමි වී බිත්ති  වාරණයක ලක්වීමට ඉඩකඩ බොහෝය.ඒ නිසා දිලිහෙන බිත්තියේ කුරුටුගෑමට පෙර ඇබින්දක් වත් සිතා බලා බිත්ති කළමණාකරනය සඳහා දැන් හිටංම පුරුදු පුහුණුව සුදානම් වෙන එක සරීර කූඩුවට යහපතිය.

Thursday, January 14, 2016

රිද්දනේ නෑ ඇබිඳක්වත් විස්වාස නැද්ද උඹට මාව...



ඇස් කන් ඇලවුණු
ගෝනි බිල්ලන්ට
වගේ වගක් නැතිවම
ලිප්ටන් වට රවුමේ පෝලිමට
අවුරුදු ගණන් බෑගිරි දුන්නු 
අසම්පූර්ණ විප්ලවය..
පොට්ටනි ගහලා දෝතින්
බාර කලේ අනාගතයට
එක හිතින් නොවුනාට
අවුරුදු ගානටම මගෑරුණු
හිඟ පත්තර පුරවන්නේ කෝම
උත්තරීතර විප්ලවයේ බර
මොළ ගෙඩිය උඩ පටවාන..
උපාධිය අරගෙන හනිකට
ගෝනි බිල්ලෙක් නොවුනොත් මම
මෑත පේන ආලකමන්දාවට 
ඉඳ හිට හරි රිංගන්ට
අහලකින් හරි පැලක් අටෝගන්ට
වරම් ගන්නේ කොහොමද..
ඉතිං සමාවෙයන් මට
ඉකි ගහන හෘද සාක්කිය
සිඳලන්න අවසරයි ඔය බොටුව
එක කඩු පාරෙන් වෙන් වෙන්න
සක්කියක් නොතියාම
ඉතිං නඬා ඉදින් ඔතනම
රිද්දනේ නෑ ඇබිඳක්වත්
විස්වාස නැද්ද උඹට මාව...